«مسافة» منصة عراقية لخطوط التنقل اليومية المتكررة (المدرسة، الدوام، الجامعة). هذه الصفحة تشرح بوضوح شنو البيانات اللي نجمعها، وليش، ومنو يشوفها.
التصفح بدون حساب
تكدر تتصفّح الخطوط المنشورة بلا حساب؛ ما نسجّل عنك شي غير إحصاء زيارة عام. ما ننشئ لك حساباً، وما ناخذ اسمك ولا رقم هاتفك — الإحصاء مربوط بمُعرِّف عشوائي يولّده جهازك (مو مُعرِّف الجهاز من النظام ولا مُعرِّفاً إعلانياً)، حتى نعرف وين يوقف الناس ووين نحسّن. الخطوط تظهر بلا أزرار، بالاسم الأول للسائق وسيارته (النوع والموديل) ومناطق خطّه وأسعارها، بلا رقمه ولا رقم لوحته ولا أي بيانات ركّاب، وأي نقطة على الخريطة تظهر مقرَّبة (بحدود ١١١ متر). نطلب حسابك أول مرة تريد تسوّي شيئاً: تسجّل منين ولوين، أو تراسل سائقاً أو تتصل بيه.
البيانات اللي نجمعها
- رقم الهاتف والاسم والجنس والمدينة: لإنشاء الحساب والدخول (برمز تحقق يوصلك برسالة — بلا كلمات سر)، ولتطبيق فصل الخطوط (نسائية/رجالية/مختلطة)، وحتى تشوف خطوط مدينتك وركّابها.
- منين ولوين: أسماء المناطق اللي تكتبها بنفسك (أو النقاط اللي تحددها على الخريطة)، ووياها الدوام، وعدد الأشخاص، ولمن الطلب (إلك، لبنتك، أو لابنك)، ونوع الخط اللي تريده، ووقت الوصول والرجوع إذا كتبتهم، ومفتاحَي «السواق يكدرون يتصلون بيك» و«السواق يكدرون يراسلونك» — حتى نطابقك مع الخطوط المناسبة ونعرف منو يگدر يتواصل وياك.
- أسماء أفراد عائلتك: إذا سجّلت أطفالك كركاب ضمن حسابك — تبقى ضمن حسابك أنت.
- موقع السائق أثناء الرحلة: يُبث فقط أثناء رحلة فعّالة، ويظهر فقط للمشتركين المفعّلين بالخط (ولمن يحمل رابط «تابع الرحلة» الذي شاركه المشترك بنفسه).
- دعم مسافة (اختياري): مسافة مجانية للراكب وللسائق — نشر الخط ما عليه فلوس، وما نطلب منك أي دفعة. واللي يحب يدعمنا، التطبيق يعرض له بصفحة «ادعم مسافة» أرقام حساباتنا الأربعة (رصيد آسياسيل، رصيد زين، زين كاش، كي كارد) حتى يحوّل بنفسه خارج التطبيق — التطبيق ما يجمع أي بيانات دفع ولا بطاقات. لما تضغط «تم، حوّلت» نسجّل، حتى يطابق فريقنا التحويل: اسمك، وإذا انت راكب أو سائق، ورقم خطّك أو رقم تسجيلك، والمبلغ اللي تذكره، والوسيلة اللي حوّلت عليها، وملاحظتك إذا كتبت وحدة، والوقت. ونسجّل قرار فريقنا (تأكيد أو رفض، وسبب الرفض اللي يوصلك)، ويوم تأكيد أوّل دعم إلك. الدعم تطوّع بحت: ما يشتري أي ميزة، ولا يقدّم خطّك، ولا يغيّر شي بالتطبيق — غير شارة «داعم مسافة» اللي تظهر بحسابك. وإذا انت سائق، الشارة علنية لمستخدمين التطبيق: تظهر على بطاقة خطّك وبصفوف التواصل عند الركّاب — بس ما تطلع بصفحات الموقع ولا بالقناة.
- محادثاتك داخل التطبيق: رسائلك المباشرة بينك وبين السائق، ومحادثة الدعم لأي سؤال، تُخزَّن على خوادمنا حتى تبقى الطرفين شايفينها.
- رمز الإشعارات: حتى توصلك إشعاراتك: رسائل محادثاتك، وراكب أو خط جديد على طريقك، وتنبيهات خطّك.
- تقارير الأعطال: إذا وقف التطبيق فجأة، يُرسل تقرير تقني تلقائي (نوع الجهاز، إصدار النظام، ومكان العطل بالكود) إلى خدمة Sentry حتى نصلّحه. التقرير ما يحتوي رقمك ولا اسمك ولا مواقعك.
- إحصاءات استخدام التطبيق: نقيس كيف يُستعمل التطبيق حتى نعرف وين نحسّنه ووين نحتاج سواق: فتح التطبيق، الشاشات الي تفتحها، طول الجلسة، والضغطات المهمة مثل البحث ومراسلة سائق أو الاتصال بيه. هذي تبقى على خوادمنا وحدها ولا تروح لأي جهة ثانية، وتُمسح تلقائياً بعد ٩٠ يوماً.
- زيارات موقع masafa.app: صفحات الموقع (مو التطبيق) تستعمل Google Analytics مثل أغلب المواقع، فتعرف Google البلد والمدينة التقريبية والصفحة الي فتحتها. هذا للموقع وحده.
- البحث عن مكان: لمّا تكتب اسم منطقة أو مَعلم بالبحث، يُرسل النص الي كتبتهإلى خرائط Google حتى تجيب اقتراحات دقيقة. ما نرسل معه موقعك ولا اسمك — والاقتراحات محصورة بحدود مدينتك. ولمّا تحط الدبّوس على الخريطة، نرسل إحداثيات الدبّوس وحدها إلى خرائط Google حتى نعرف اسم المنطقة الي هو بيها ونكتبه لك تحت الخريطة — بلا اسمك ولا رقمك.
شلون نستخدمها
- مطابقة طلبك مع خطوط تمرّ بطريقك وتشغيل الخدمة.
- الإشعارات: راكب أو خط جديد يمرّ من منطقتك، أوّل مرة يتواصل وياك شخص، ورسائل محادثاتك، وتنبيه قبل ما يتوقف خطّك بيوم، وردّنا على دعمك إذا دعمت. وعلى خطوط الخريطة (الطريقة القديمة): قبول تقديمك على خط، وإشعارات الرحلة (انطلاق السائق، وصعود ووصول أطفالك).
- الدعم وحل المشكلات، وإصلاح الأعطال من تقاريرها التقنية.
منو يشوف بياناتك
بمسافة نوعين من الخطوط: الخط المكتوب (السائق يكتب مناطقه وسعر كل منطقة، والراكب يكتب منين ولوين)، وخط الخريطة (الخطوط والطلبات اللي انسجلت بالطريقة القديمة — يصير الخط مكتوب أول ما يعدّله سائقه، والطلب يصير مكتوب أول ما يحفظه صاحبه). القواعد تختلف بينهم شوية:
على الخط المكتوب:
- رقمك انت (الراكب): يوصل لأي سائق عنده خط مكتوب مفتوح إلك بمدينتك — مو بس اللي خطّه يمرّ منك أو يروح لوجهتك — إذا كل هذي صحيحة بنفس اللحظة: خطّه منشور هسه (أسبوعه ما خلص، وما وقفه ولا لغاه)، ومفتاح «السواق يكدرون يتصلون بيك» عندك شغّال، وتسجيلك لسه فعّال (ما وقفته انت، ولا انوقف لأنك ما جاوبت «لازلت تدوّر؟»، ولا وقفه فريقنا)، وتسجيلك بنفس مدينة خطّه. و«مفتوح إلك» يعني الخط (شباب/بنات/مختلط) يناسب اللي الطلب إله — «لبنتي» تنحسب بنات و«لابني» تنحسب شباب — وإذا اخترت بـ«نوع الخط» بنات أو شباب بس، سائق الخط المختلط ما يوصله رقمك.
- الرسائل: أي سائق من نفس هذولا (خطّه المكتوب مفتوح إلك، ومنشور هسه، وبمدينتك، وتسجيلك فعّال) يگدر يفتح وياك محادثة بالتطبيق إذا مفتاح «السواق يكدرون يراسلونك» عندك شغّال — حتى لو مفتاح الاتصال طافي، بس وقتها بلا رقمك. إذا طفّيت مفتاح الرسائل، ما يگدر سائق جديد يفتح وياك محادثة، والمحادثات المفتوحة تبقى. تغيّر المفتاحين بأي وقت، وتگدر توقف تسجيلك أو تحذفه.
- رقمك يوصله من مكانين بس: لما يضغط «اتصل» أو «راسله» عليك، وبرأس محادثتكم. ونفحص هذي الشروط كل مرة تنفتح المحادثة: لو وحدة منها ما عادت صحيحة (خلص أسبوع خطّه وما مدّده، وقفه أو لغاه، طفّيت مفتاح الاتصال، وقفت تسجيلك أو حذفته، أو غيّرت «نوع الخط» لنوع ما يشمل خطّه)، رقمك يختفي من عنده، ويرجع لو رجعت الشروط. إذا طفّيت مفتاح الاتصال، ما يشوف رقمك أي سائق، ويگدر يراسلك بالتطبيق إذا مفتاح الرسائل شغّال.
- رقمك ما يطلع بقائمة الركّاب، ولا بـ«من تواصل»، ولا بصفحات الموقع، ولا بالقناة. يوصل بس إذا كتبته انت بنفسك برسالة.
- شنو يشوف السائق عنك: السواق اللي يشتغلون بمدينتك يشوفون بقائمة الركّاب منين ولوين مثل ما كتبتها، والدوام، وعدد الأشخاص، ولمن الطلب (إلك، لبنتك، أو لابنك)، ونوع الخط اللي اخترته، ووقت وصولك ورجوعك إذا كتبتهم، وأي مفتاح عندك شغّال — بلا اسم ولا رقم. وإذا تواصلتوا (انت ضغطت «راسله» أو «اتصل» — حتى لو اتصال بس — أو هو كتب إلك)، يشوف اسمك الأول بس، بـ«من تواصل» وبالمحادثة. ولو انحذف حسابك، ينحذف تواصلكم، فما يبقى عنده بـ«من تواصل» منين ولوين ولا عدد الأشخاص.
- رقم السائق: يوصلك لما تضغط «اتصل» أو «راسله» على خطّه، ويظهر برأس محادثتكم، طول ما خطّه منشور بس — ويختفي لما يخلص أسبوع خطّه (٧ أيام) وما يمدّده، أو يوقف خطّه أو يلغيه. ما لازم خطّه يناسبك، بس لازم يكون لفئتك (شباب/بنات/مختلط). اسمه الأول وسيارته (النوع والموديل، وصورتها إذا رفعها)، وشارة «داعم مسافة» إذا عنده، على بطاقة الخط؛ رقمه ما يطلع على البطاقة ولا بصفحات الموقع ولا بالقناة.
على خط الخريطة (الطريقة القديمة):
- رقم السائق: يظهر برأس المحادثة طول ما خطّه منشور. ولو قدّمت على خطّه (وتقديمك لسه قائم) أو صرت راكب بيه، يبقى الرقم عندك حتى بعد ما ينتهي النشر، لأن التواصل صار وقت النشر.
- رقمك انت: ما يوصل للسائق أبداً من التطبيق (إلا إذا ثبّتت مقعدك عنده: وقتها سائق خطك يشوف رقم راكبه بقائمة ركّابه، قرار 297) — يشوفه بس إذا كتبته انت بنفسك برسالة.
- نقطة صعودك: السواق المسجّلين يشوفون نقطة صعودك بالضبط مثل ما اخترتها على خريطتهم — بلا اسمك ولا رقمك. ولما تقدّم على خط، سائقه يشوف همين اسمك الأول. وبالصفحات العامة وللزائر بلا حساب، موقعك يظهر تقريبياً بس (بحدود ١١١ متر).
- طلبك بقائمة الركّاب: طلبك المسجّل بالخريطة يطلع للسواق بقائمة الركّاب بنفس كلام الطلب المكتوب (منين ولوين، الدوام، عدد الأشخاص، ولمن)، وبنقطة على خريطتهم — بلا اسمك ولا رقمك. أي سائق عنده خط منشور مفتوح إلك بمدينتك (مكتوب، أو خط خريطة يمرّ من طريقك) يگدر يراسلك بالتطبيق، بس ما يگدر يتصل بيك — لحد ما تحفظ طلبك بالطريقة المكتوبة وتختار مفاتيحك.
- لو تواصلت من قائمة الخطوط المكتوبة ويا سائق خط خريطة، يوصلك رقمه (إذا خطّه منشور وبمدينتك) وبعدها بالمحادثة حسب القاعدة أعلاه — وهو ما يشوف رقمك أبداً، سواء المفتاح شغّال لو طافي.
للكل:
- المحادثات: المحادثات مباشرة بين الراكب والسائق، وتبقى مفتوحة للطرفين. فريق مسافة يقرأ المحادثات لمتابعة البلاغات والدعم.
- البلاغ: زر «بلّغ عن هذا الشخص» برأس المحادثة يرسل رسالة منك لمحادثة الدعم وياك، بيها الاسم الأول للشخص، وسبب البلاغ، وملاحظتك إذا كتبت وحدة. ونسجّل عندنا منو بلّغ على منو، وبأي محادثة، وليش. البلاغ ما يحظر أحد وما يسكّر المحادثة — فريقنا يتابعه وياك.
- رابط «تابع الرحلة»: يعرض دقائق الوصول وحالة الصعود فقط — بلا خريطة، بلا أرقام هواتف، بلا ركاب آخرين. صاحبه يلغيه بأي وقت.
- ما نبيع بياناتك لأي جهة، وماكو إعلانات بالتطبيق.
الردود الآلية بمحادثة الدعم وبوت تليغرام
أوّل ردّ على رسائلك بمحادثة الدعم داخل التطبيق، وبمحادثتك الخاصة ويا بوت مسافة على تليغرام، ممكن يكتبه مساعد آلي تابع لفريق مسافة، والفريق يقرا المحادثة ويتدخّل بأي وقت. إذا سألته «انت روبوت؟» يجاوبك بصراحة، وإذا كتبت «أريد موظف» بأي وقت، تنتقل محادثتك لواحد من الفريق.
- شنو يوصل لـGoogle: حتى ينكتب الرد، نرسل رسائل محادثة الدعم (رسائلك وردود فريقنا) ووياها بعض معلومات حسابك إلى خدمة Gemini من Google: اسمك الأول، وإذا انت راكب أو سائق، ومدينتك، وتفاصيل تسجيلك أو خطّك — أسماء المناطق، والدوام، والأسعار، وحالة الخط (منشور لحد يمتى، أو متوقف).
- شنو ما يوصل أبداً: رقم هاتفك (وأي رقم هاتف تكتبه برسالة نخفيه قبل الإرسال)، ورقم لوحة سيارتك، ومواقعك على الخريطة، ولا رقم أو موقع أي شخص ثاني؛ ومن الخطوط العامة بس الاسم الأول للسائق ومناطق خطه وأسعاره، ومن بلاغك اسم الشخص اللي بلّغت عنه كما كتبته.
- التعديلات: المساعد يگدر يعدّل تسجيلك أو خطّك (مثلاً يغيّر الدوام، أو يوقفه مؤقتاً، أو يفعّله أسبوع)، ويگدر يحذف تسجيلك أو يلغي خطّك نهائياً — بس إذا انت طلبت، وبعد ما يكتبلك شنو راح يصير بالضبط وتجاوبه «نعم». وما يلمس الدفعات ولا طلبات «ادعم مسافة» ولا حسابك — هذي يتابعها فريقنا بنفسه.
- على تليغرام: نعرف إنك صاحب الحساب إذا شاركت رقمك من زر البوت وطلع نفس رقم حسابك بمسافة؛ وقتها رسائلك بالبوت تنضاف لمحادثة الدعم مالتك بالتطبيق. وبلا مشاركة الرقم، المساعد يجاوب أسئلة عامة عن التطبيق بس، بلا أي بيانات من حساب.
- Google لا تستعمل هذي الرسائل لتحسين منتجاتها، وتحتفظ بها مدة محدودة لكشف إساءة الاستعمال فقط، وقد تُعالَج خارج العراق.
نشر خطّك (للسوّاق)
نشر الخط مجاني. أول ما تسجّل خطّك، تفاصيله تظهر للركّاب داخل التطبيق، وتُنشر أيضاً بقناة مسافة على تليغرام بمدينتك (وعلى إنستغرام إذا نشرها فريقنا) — باسمك الأول، نوع سيارتك، مناطق خطّك وسعر كل منطقة والوجهة، ودوام خطّك (صباحي/مسائي). رقم هاتفك ما يُنشر بالقناة — يظهر للركّاب داخل التطبيق بس، حسب القواعد أعلاه. خطّك يبقى منشور ٧ أيام، وبعدها يتوقف بروحه ويختفي عن الركّاب لحد ما تمدّده بضغطة — مجاناً. ومحادثاتك وياهم تبقى.
طلبك بقناة مسافة (للراكب)
لما تسجّل خطك، ننشر بقناة مسافة منين ولوين مثل ما كتبتها، والدوام، وعدد الأشخاص، وإذا الخط شباب أو بنات — بلا اسم ولا رقم.
الإعلانات وكيف نوصل للناس
نعلن عن مسافة على فيسبوك وإنستقرام، وحتى نعرف إذا إعلاناتنا تنفع أو تضيع فلوس، نسوي شغلتين — ونقولهما بصراحة:
- على موقع masafa.app (مو التطبيق): فيه أداة قياس من ميتا («البكسل») تسجّل إنه أحد فتح الصفحة وضغط زر التنزيل. تسجّل الفعل لا الشخص: بلا اسمك وبلا رقمك.
- أرقام هواتف مستخدمينا: نرسل رقمك إلى ميتا مشفّراً بطريقة لا تُرجَع (بصمة رقمية بدل الرقم نفسه)، ولسببين اثنين بس: حتى ما ندفع ونعرض عليك إعلاناً وإنت عندك التطبيق أصلاً، وحتى تلگى ميتا ناساً يشبهونك نعرض عليهم الإعلان. ميتا ما تقدر ترجّع الرقم من البصمة، وما نرسل معه اسمك ولا مشاويرك ولا أي شي عن استعمالك للتطبيق.
وتبقى القاعدة كما هي: ما نبيع بياناتك، وماكو إعلانات داخل التطبيق. وإذا ما تريد رقمك يدخل بهذا، راسلنا بالواتساب وننزّله — أو احذف حسابك وينمسح كل شي (فوق).
التخزين والحماية
البيانات تُخزن على خوادمنا المؤمّنة، والاتصال بالتطبيق مشفّر بالكامل (HTTPS). موقع السائق يُحفظ كآخر نقطة فقط أثناء الرحلة — ما نحتفظ بأرشيف تحركات.
حذف الحساب والبيانات
شنو ينحذف باللحظة نفسها: اسمك، ورقم هاتفك (فيتحرّر للتسجيل من جديد لو رجعت)، وجنسك ومدينتك، وأفراد عائلتك المسجّلين، وإشعاراتك، ومشاركاتك بالمحادثات، وكل جلساتك — فأي جهاز داخل بحسابك يخرج فوراً. وتنخرج من كل خطوطك؛ ولو عندك خط تسوقه، ينلغي ويوصل ركّابه خبر.
شنو يبقى، وليش: صفوف الدفع وطلبات الدعم وسجل التدقيق تبقى بلا هوية لأنها سجل مالي وحسابي مطلوب، ورسائلك داخل محادثة خطّك تخصّ أطرافاً آخرين ما نملك محوها من عندهم.
وأثر قديم واحد من رقم الهاتف ممكن يبقى، ونگوله بصراحة: لحد ما صار النشر مجاني (٢٧ أيلول ٢٠٢٦)، كان أوّل خط لكل سائق جديد ينشر ٧ أيام هديّة، وحتى ما تنقبض الهديّة مرّتين بنفس الرقم كنّا نحتفظ بـبصمة رقمية من رقم السائق اللي أخذها — رقمه ممزوج بمفتاح سرّي عندنا ومشفَّر بطريقة لا تُرجَع — ويّاها بس تاريخ الهديّة ورقم الخط اللي انتشر بيها. هسه الهديّة ما عادت موجودة وما نسجّل أي بصمة جديدة؛ البصمات اللي انسجلت قبل تبقى كسجل قديم، حتى بعد حذف الحساب. ما تحمل اسم ولا رقم، وما يگدر أحد، حتى إحنا، يرجّع الرقم منها.
طلب دعم لسه ما أكّده فريقنا ما يمنع الحذف أبداً — الدعم ما يفعّل شي، فتحذف حسابك بأي وقت. الاستثناء الوحيد دفعة قديمة (من قبل ما يصير النشر مجاني) لسه قيد مراجعة فريقنا: يُرفض الحذف حتى تُحسم — تأكيدها بعد الحذف كان سيفعّل شيئاً على حساب ما عاد موجود، فتضيع فلوسك بلا أثر. راسلنا وننهيها بنفس اليوم.
التواصل
لأي سؤال عن الخصوصية: واتساب +964 780 751 1444 أو البريد support@masafa.app.
أي تغيير جوهري على هذه السياسة ننشره بهذه الصفحة مع تحديث التاريخ أعلاه.